Móttökuáætlun fyrir nemendur með annað móðurmál en íslensku

Móttökuáætlunin er fyrir nemendur sem hafa annað móðurmál en íslensku. Hún gildir einnig, eftir því sem við á, um nemendur sem hafa dvalist langdvölum erlendis og hafa litla kunnáttu í íslensku.

Áætlunin byggist á lögum nr. 92/2008 um framhaldsskóla og reglugerð nr. 654/2009 um rétt nemenda í framhaldsskólum til kennslu í íslensku. Markmiðið er að nemendur fái þann stuðning sem þeir þurfa til að stunda nám við hæfi, efla færni sína í íslensku og taka virkan þátt í skólasamfélaginu.

Móttaka og námsáætlun
Komi nemandi úr íslenskum grunnskóla vinnur FMOS með einkunnir og umsagnir sem fylgja nemandanum. Ef ástæða þykir til er haft samband við grunnskólann, með samþykki nemanda og/eða forsjáraðila, og nánari upplýsinga aflað sem skipta máli fyrir nám og stuðning.

Deildarstjóri íslenskubrautar boðar nýjan nemanda í móttökuviðtal. Forsjáraðilar taka þátt þegar nemandi er yngri en 18 ára. Annað starfsfólk eða sérfræðingar taka þátt eftir þörfum. Túlkur er kallaður til þegar þörf er á og sér skólinn um að útvega túlkaþjónustu.

Í móttökuviðtalinu er meðal annars:

• aflað upplýsinga um bakgrunn, fyrri skólagöngu, móðurmál og önnur tungumál, fyrri stuðning og aðstæður sem geta haft áhrif á nám

• lagt mat á íslenskufærni, styrkleika og færni á öðrum námssviðum

• veittar upplýsingar um nám, starfshætti, reglur, þjónustu, stuðning og samstarf við heimili

• veittar upplýsingar um hvaða námsgögn nemandi þarf að útvega vegna náms

• farið yfir Innu og önnur kerfi sem nemandi og forsjáraðilar þurfa að þekkja

Gerð er einstaklingsbundin námsáætlun (einstaklingsnámskrá skv. reglugerð nr. 654/2009) sem tekur mið af bakgrunni og málasvæði nemandans, tungumálafærni, færni á öðrum námssviðum og námsmarkmiðum.

Íslenskubraut og íslenska sem annað tungumál
FMOS býður upp á íslenskubraut og áfanga í íslensku sem öðru máli (ÍSAN og ÍSAT). Við mat á námsstöðu er meðal annars metið hvort nám á íslenskubraut henti nemandanum eða hvort hann geti stundað nám á annarri námsbraut samhliða ÍSAN og ÍSAT áföngum.

Nánari upplýsingar eru í námsbrauta- og áfangalýsingum skólans.

Móðurmál nemenda
Nám í móðurmáli má meta til eininga í frjálsu vali eða í stað annars erlends tungumáls að uppfylltum skilyrðum um slíkt mat.

Ráðgjöf, samráð og eftirfylgni
Nemendur hafa aðgang að náms- og starfsráðgjöf FMOS og upplýsingum um annan stuðning innan og utan skólans.

Deildarstjóri íslenskubrautar, kennarar og náms- og starfsráðgjafi hafa samráð um nám og stuðning eftir þörfum.

Lögð er áhersla á að styrkja félagsleg tengsl nemenda og stuðla að gagnkvæmri félagslegri aðlögun. Fylgst er með námsframvindu og ástundun og námsáætlun og stuðningur endurskoðuð eftir þörfum.

Ábyrgð og endurskoðun
Deildarstjóri íslenskubrautar hefur umsjón með móttöku nemenda með annað móðurmál en íslensku í samstarfi við annað starfsfólk skólans eftir því sem við á.

Móttökuáætlunin er birt sem hluti af skólanámskrá FMOS á vef skólans. Hún er endurskoðuð reglulega og þegar breytingar verða á lögum, reglugerðum eða starfsháttum skólans.

Síðast breytt: 23. ágúst 2026