Áætlun gegn einelti

Stefnuyfirlýsing
Starfsfólk og nemendur Framhaldsskólans í Mosfellsbæ líða ekki einelti undir nokkrum kringumstæðum. Einelti getur komið upp hvar sem er í samfélaginu og ber að sporna við því með fyrirbyggjandi aðgerðum og bregðast við því ef það kemur upp. Allir, bæði starfsfólk og nemendur skólans, hafa hlutverki að gegna til að fyrirbyggja einelti í skólanum og er áhersla lögð á gagnkvæma virðingu í samskiptum. Skólinn tekur allar tilkynningar um einelti alvarlega og bregst skjótt við.

Skilgreining
Einelti er endurtekin athöfn eða hegðun sem er til þess fallin að niðurlægja, gera lítið úr, móðga, særa, mismuna eða ógna og valda vanlíðan hjá þeim sem hún beinist að. Einelti getur verið líkamlegt og/eða andlegt og getur jafnt birst í gegnum bein samskipti og í gegnum samfélagsmiðla. 

Einelti getur m.a. birst í eftirfarandi (listinn er ekki tæmandi):

• Endurteknar uppnefningar eða baktal
• Að koma í veg fyrir að fólk spjalli eða vingist við ákveðna einstaklinga
• Ef hæðst er að öðrum t.d. vegna útlits, þyngdar, menningar, kynhneigðar, kynvitundar, þjóðernis, trúar, húðlitar, fötlunar eða heilsuleysis
• Illkvittin ummæli um einstakling
• Myndir eða myndbönd af einstaklingi sent eða dreift gegn vilja hans
• Útilokun
• Eigur eyðilagðar
• Líkamlegar meiðingar t.d. sparkað, slegið, hrækt eða fellt

Ferli eineltismála
Fyrirbyggjandi aðgerðir gegn einelti skulu felast í reglulegri fræðslu um eineltismál, bæði fyrir nemendur og starfsfólk, t.d. með aðstoð utanaðkomandi ráðgjafa. Áætlun gegn einelti skal kynnt nemendum og starfsfólki árlega.
Einstaklingur sem verður var við einelti skal tilkynna það beint til náms- og starfsráðgjafa eða starfsmanns sem tekur þá ákvörðun um hvort málið þurfi að fara til náms- og starfsráðgjafa.

Nemendur
Í framhaldi af tilkynningu um einelti fer eftirfarandi ferli í gang:

• Náms- og starfsráðgjafi kallar saman kennara og stjórnendur
• Rætt er við þann/þá aðila sem hlut eiga að máli ásamt forráðamanni/-mönnum ef nemandi undir 18 ára aldri
• Hlustað er á sjónarmið allra aðila og gætt trúnaðar og tillitssemi
• Málið er unnið í samráði við aðila málsins. Sé hins vegar um brot á landslögum að ræða getur málinu verið vísað til lögreglu
• Niðurstöður kynntar fyrir þolanda og geranda þegar þær liggja fyrir

Starfsfólk
Ef upp kemur grunur um að starfsmaður sé lagður í einelti skal tilkynna það til skólastjórnenda eða trúnaðarmanns. Í framhaldi af tilkynningu um grun um einelti fer eftirfarandi ferli í gang:

• Skólastjórnendur og/eða trúnaðarmaður skipuleggja rannsókn málsins. Telji starfsmaður sig verða fyrir einelti af hálfu skólastjórnenda má leita beint til mennta- og menningarmálaráðuneytisins
• Hlusta skal á sjónarmið allra aðila og gætt trúnaðar og tillitssemi
• Ekki er aðhafst í málinu nema sá sem verður fyrir einelti sé samþykkur. Sé hins vegar um brot á landslögum að ræða getur málinu verið vísað til lögreglu
• Niðurstöður kynntar fyrir þolanda og geranda þegar þær liggja fyrir

Hér má sjá myndræna framsetningu á ferlinu: nemendur og starfsmenn 

Síðast breytt: 16. september 2026