Stofnun Framhaldsskólans í Mosfellsbæ

Síðast breytt: 9. maí 2017

Samkomulag um stofnun Framhaldsskólans í Mosfellsbæ var undirritað 19. febrúar 2008 af menntamálaráðherra og bæjarstjóranum í Mosfellsbæ, þar sem gert var ráð fyrir að skólinn myndi hefja starfsemi haustið 2009. Í samkomulaginu kom fram að aðilar væru sammála um að byggja nýjan skóla og að í fyrsta áfanga yrði gert ráð fyrir allt að 4.000 m2 byggingu sem myndi rúma 4-500 nemendur. Við hönnun hússins og undirbúning skólastarfs yrði lögð áhersla á sveigjanleika og möguleika til nýbreytni. Jafnframt yrði við ákvörðun lóðarstærðar yrði gert ráð fyrir möguleikum til verulegrar stækkunar í framtíðinni.

Stefna skólans gerði ráð fyrir því að kennsluhættir einkenndust af því að nemendur yrðu virkir þátttakendur í eigin námi og myndu öðlast þannig sjálfstæði og frumkvæði. Til að ná þessu fram yrðu notaðar fjölbreyttar verkefnamiðaðar kennsluaðferðir þar sem hugmyndafræðin myndi ganga út á að nemandinn myndi tileinka sér námsefnið í gegnum verkefni sem hann ynni eða umræður sem hann tæki þátt í. Gert var ráð fyrir að skólabyggingin yrði tilbúin haustið 2011, og skólinn yrði starfræktur fyrstu tvö árin í Brúarlandi, elsta skólahúsi Mosfellsbæjar. Þessar áætlanir breyttust og skólabyggingin var tilbúin í byrjun árs 2014 og hófst vorönn 2014 þar. Þó hafði verið útskrifað úr húsinu 20. desember 2013.


Útlit síðu:



Þetta vefsvæði byggir á Eplica